श्री क्षेत्र दत्तधाम

महाराष्ट्रातील प्रती गाणगापूर म्हणजेच वसमत रोड, कारेगाव, जि. परभणी येथील श्री क्षेत्र दत्तधाम.

प. पु. अखंडानंद सरस्वती (ओक) स्वामी महाराज यांनी १९८१ मध्ये श्री दत्त जयंतीच्या उपलक्ष्याने श्री लक्ष्मी नारायण मंदिर, परभणी येथे भव्य १००८ श्री गुरुचरित्र सप्ताहाचे आयोजन केले. या सप्ताहात श्री गुरुचरित्राची पोथी वाचकांना प्रसाद म्हणून वितरित करण्यात आली, तसेच विपुल प्रमाणात अन्नदानही करण्यात आले. या धार्मिक कार्याला मराठवाडा, महाराष्ट्र व महाराष्ट्राबाहेरील भक्तांचा मोठा प्रतिसाद मिळाला. विशेष म्हणजे, या सप्ताहाचा संपूर्ण खर्च भिक्षेच्या माध्यमातून जमा करण्यात आला आणि शिल्लक रक्कम श्रीक्षेत्र दत्तधामच्या स्थापनेसाठी वापरण्यात आली. अल्पावधीतच दत्तधाम येथे दत्त मंदिराची उभारणी सुरू झाली, जिथे गावोगाव भिक्षा मागून मंदिर निर्माण केले गेले.

श्री दत्त मंदिराच्या गाभाऱ्यात त्रिमुर्ती दत्तात्रेयांची अत्यंत आकर्षक मूर्ती प्रतिष्ठित आहे. त्यांच्या उजव्या बाजूस कलीयुगातील प्रथमावतार श्रीपाद श्रीवल्लभ यांची मूर्ती आणि डाव्या बाजूस द्वितीय अवतार प. पु. श्री नृसिंह सरस्वती स्वामी महाराज यांची मूर्ती स्थापित करण्यात आलेली आहे.

श्री दत्त मंदिराच्या प्रदक्षिणा मार्गावर श्रीमद् आद्य शंकराचार्य, प. पु. श्रीमद् वासुदेवानंद सरस्वती स्वामी महाराज, श्री मत्स्येंद्रनाथ, प. पु. श्री दिक्षित स्वामी महाराज, प. पु. श्री योगानंद सरस्वती आणि प. पु. श्री सीताराम महाराज यांच्या मूर्ती राऊळात विराजमान आहेत. या सर्व संतांची मूर्ती भक्तांना कर्ममार्ग व भक्तीमार्ग दाखवून सन्मार्गी नेण्यासाठी मार्गदर्शक आहेत.

प. पु. अखंडानंद सरस्वती स्वामी यांच्या इच्छेनुसार श्रीदत्त महाराजांच्या चरणाजवळ, श्रीदत्त मंदिराच्या पुढे त्यांचे समाधी स्थान तयार करण्यात आले. याच ठिकाणी प. पु. ओक स्वामींचे समाधी मंदिरही उभारले गेले आहे. प. पु. ओक स्वामींच्या समाधीनंतर, श्री क्षेत्र दत्तधामच्या पुढील विकास व विविध कार्ये प. पु. श्री मकरंद बाबा आणि प. पु. श्री गुरुआई यांच्या मार्गदर्शनाखाली राबवली जात आहेत.

श्री क्षेत्र दत्तधाममध्ये श्रीदत्त मंदिराच्या भव्य सभामंडपाची निर्मिती केली गेली आहे. यासोबतच प. पु. ओक स्वामींचे समाधी मंदिर, सभामंडप, भक्तनिवास, साधनाधाम, श्री दत्तसाई धाम, श्री अन्नपूर्णामाता भोजनशाळा, गोशाळा, पाकशाळा, भांडारगृह यांसारख्या अनेक भव्य आणि आवश्यक वास्तूंची उभारणी करण्यात आली आहे. श्री क्षेत्र दत्तधाम येथे अनेक समाजोपयोगी आणि विकासात्मक कार्ये राबवली जात आहेत.